RSS

Friday, January 15, 2010

افتتاحية


تصفيق حاد وهتافات ... أنوار تتلألأ .. وألعاب نارية تملأ المكان .. أصعد أنا خشبة المسرح وأنا ألوح للجمهور وعلى وجهى ابتسامة عريضة .. وكأنى عدت لتوى من فتح عكا .. طبعا السؤال خرم ودنى فين ميرام .. فين ميرام .. مش أنتوا شركا فى المدونة دي ؟؟؟ ... هيا مجتش معاكي ليه ؟؟ الإجابة بسيطة وسهلة .. ميرام أصلا واقفة مستنيانى على خشبة المسرح من تلتين ساعة هههههه .. أرى ميرام تنظر لي بابتسامتها المعهودة وكأنها تقولى لى : يعنى اموتك دلوقتى ولا اعمل ايه .. انا هغيرك خلاص ( معلش عدتها .. زى بنتنا برده ) ... انظر لها بابتسامتى المعهودة برده ولسان حالى يقول : متقدريش ههههه


بقالنا كام يوم عمالين نفكر هنكتب ايه فى البوست الافتتاحى بتاع المدونة .. أولا فكرة المدونة واسمها كان فكرة ميرام ... صقفة لميرام يا ولاد طول عمرها مبدعة وخلاقة وانا بحيي فيها روح الابتكار ... كان لازم أنا اعمل حاجة فى الليلة دى .. وإلا هبقى جاية اهوى المدونة وارشها معطر جو كل يوم وخلاص .. فاتفقنا انى انا اللى اكتب بوست الافتتاحية دا


المدونة دى فكرتها بتتلخص فى ان احنا كتير بيفيض عندنا فضا او حبة وقت مش بنعرف نعمل فيهم ايه هتبقى حاجة جميلة اوى لما نفضفض لبعض فى الوقت دا عن مواقف كتير بنتعرض لها كل يوم .. سواء بتحصل لنا او لغيرنا .. ساعات المواقف دى مش بنعرف ناخد فيها قرار .. بساطة لأننا بنكون جواها ومش عارفين نفكر .. ومش بتكون عدت علينا قبل وبالتالى بيكون النتيجة اننا بنفشل فى اننا ناخد قرار صح .. وبنبقى محتاجين حد نفضفض معاه ونحكيله .. سواء احنا هنقول خلاصة تجربتنا من القصة دى او هنسأل كان لازم نتصرف ازاى

حاجة كمان ... بدل مانضيع الفضا دا فى حاجات مش مفيدة او يقتلنا الفراغ زى مانا بقول دايما .. يستحسن اننا نفكر ازاى نقضي على الفضا دا بحاجات مفيدة .. هنقدم لكم اقتراحات بحيث انتوا كمان تتفاعلوا معانا .. سواء باقتراحاتكم .. او فضفضاتكم اللى هتحكولنا فيها عن حاجات انتوا عايزين تفضفضوا بيها ... بحيث اننا كلنا نشترك فى الحكم عليها


يارب تكون الفكرة وصلت .. وقبل كل دا تكون عجبتكم

تحياتنا للجميع ومنتظرين مشاركتكم ومتابعتكم وتشجيعكم